Նոր Արեշում փրկարարները փլատակներից դուրս բերեցին մեկ երիտասարդի. Նա ողջ է. եւս մեկ կին փլատակներում է եւ ողջ է

Քիչ առաջ Նոր Արեշի 34 փողոցում տեղի ունեցած պայթյունի վայրից փրկարարները փլատակներից դուրս բերեցի մի քաղաքացու եւ պատգարակով մոտեցրին շտապօգնության մեքենային:

NEWS.am-ի թղթակիցը դեպքի վայրից հայտնում է, որ նախնական տեղեկություններով, քաղաքացին բարեբախտաբար ողջ է: Խոսքը երիտասարդ տղայի մասին է, հարեւանները պատմում են, որ նա մենակ է եղել տան, երբ պայթյունը որոտացել է:

ՆԳՆ մամուլի քարտուղար Նարեկ Սարգսյանը լրագրողների հետ զրույցում հաստատեց, որ երիտասարդ տղամարդու են դուրս բերել, ով ողջ է. «Հաստատ մի կին կա եւս փլատակներում, այս պահին այդ կնոջն են փորձում դուրս բերել: Ողջ է, այս պահին ձայներ լսվում են: Նույնիսկ բուժօգնություն են ցույց տալիս: Կիսով չափ փլակատներում է: Զուգահեռ միջոցառումներ են իրականացվում՝ հասկանալու համար՝ էլի կա՞ն տուժած անձինք փլատակներում, թե ոչ: Նախնական, երկու տուն է փլուզվել, հարակից տները վնասվել են:

Պատճառների մասին ոչինչ չենք կարող ասել, քննություն պետք է տեղի ունենա»,-ասաց նա:

Оставьте комментарий